RSS

أهلا و سهلا فيكم في مدونتنا اللي حتكون زي دفتر يومياتنا ... إحنا و بس طبعا .. أنا سيمو و أمولي و أيووش و إيموز و شوشو و ضوضو و ندوش و هيفو و أراوي و سمووور.... بتمنى تستمتعوا معنا و تقضوا أحلى الأوقات

‏إظهار الرسائل ذات التسميات مصايب مضحكة. إظهار كافة الرسائل
‏إظهار الرسائل ذات التسميات مصايب مضحكة. إظهار كافة الرسائل

إعادة تدوير مشروع الجيولوجيا!!



السلام عليكم و رحمة الله و بركاته....


بصرااااحة.... هالاسبووووع كان من أصعب أسابيع هالفصل و كان جدا جدا جدا حافل و مليان شغلات كتيرة ع الآخر!! و لسه هاد و لا إشي... بما انه هالفصل قصير كتيييير و كمية المادة اللي بناخدها كبيرة.. و فوق هيك علينا تسليم المشاريع و التقارير و الأبحاث... و معها لازم نراجع دروسنا أول بأول و نحل الواجبات و كماااااااان ندرس لامتحانات التقويم......
عنجد كنا كتير كتير مضغوووطين.... الله المستعان


خلال هالاسبوع... امتحنا فيزيا و كيميا و جيولوجيا و رياضيات ( يوم الخميس اللي فات ) و دين و انجليزي....و الحمدلله
في منهم الصعب و السهل.... و انا حاطة قرار بنفسي... انه احسنلي ما اراجع اجاباتي بعد الامتحان لحتى ما أتنكد..لأنه هيك هيك رح أعرف درجتي و أعرف اخطائي و أتعلم منها...


الحلوووو بهداك الأسبوع ....مشروع الجيولوجيا...
رحنا لبيت ايموز عشان نعمل المشروع... و للأسف كالعادة أنا اتأخرت عليهم و ضيعنا وقتنا بالضحك و اللعب 
و هالحوار بلخص اللي صار معنا .... ( كنا سيمو - ايموز - هيفو - روابي )






طيب......... و النتييييجة... المشروع طلع بهادا الشكل






و صرنا نضضضضضضضضحك ع الهبل اللي عملناه!!! عنجد ضيعنا وقتنا على اشي....
طيييب.... اممممممممممم.... بدي منكم... اللي فاهمة شو هو المشروع تحكيلنا و رح أعطيها أكبر جااااااااائزة
أتحدااااكم .... يلا ... نشوووف ...




و بلشنا نحكي عنه ع الفييييس.......






و بالنهاية قررنا نعيده و ظلع شكله رهيييييييييييب و حلووو كتير ان شاء الله رح نفرجيلكم اياه الاسبوع القادم.....


سؤالنا : شو هو المشروووع؟؟؟؟ بدنا توقعاتكم....


ترقبوووووووووووا شكل المشروع النهائي بعد اعادة تدويره
تحياتي لكم.... سيمو


2-2-2012

  • Digg
  • Del.icio.us
  • StumbleUpon
  • Reddit
  • RSS




كيفكم


حبيت احكيلكم عن الي صار في باقي يوم التكريم


هاد يا حلويين كنت جايبة كامرتي معي عشان نتصور... واتصورنا صور حلوة كتير بس حكولنا يلا على الصفوف الحصة التانية بدت انصدمنا ما تصورنا كتير ....
المهم خليت الكاميرا بجيبتي خفت عليها من السرقة ولا حد يلعب فيها ... ورحت على صف الانجليزي لأنو بكل بساطة علينا انجليزي
الأبلة شافت عددنا اتقلص فحكولها مجموعة بنات انو بدنا نتمحن يمكن كانوا خمس لست بنات حتى ايوش كانت من الي بمتحنوا ووحدة لقبها بطة ( لقبها المنتشر بين الكل)....
المهم الأبلة ما عرفت شو اتسوي اعطنا احنا ورقة عمل وخلت البنات الي ما امتحنوا يمتحنوا وراحت اعدت عندهم عشان ما حد يغش في آخر الصف ।
نحنا خلصنا حل وملينا وانا كنت قاعدة جنب صحبتي رورو وبطة خلصت واجت عنا وقعدت استهبل واصورهم وبعدين بطة صارت اتصورني مع رورو وكانت الصور تحفة بتجنن..... بس الأحلى من هيك انو الأبلة مش شايفنا ولا دريانا بالطبخة ... ازا بدنا نرفع الكاميرا شوي بنات الصف سور جاهز للحماية ههههههههههههههههه
عنجد كان يوم بجنن
على فكرة هاد مو اول هبل النا ولا آخره ان شاء الله
قال علمي قال ههههههه
بس يارب ما تكون الأبلة شايفانا ومطنشة

  • Digg
  • Del.icio.us
  • StumbleUpon
  • Reddit
  • RSS

مصيبة بس زي العسل - الجزء الأخير

اليوم المفتوح 1-12-2010 \ الجزء الأخير


مرحبا يا حلوين ... كيفكم اليوم ؟؟حابين تعرفوا ايش صار معنا !!
الحين رح ندخل بالمواقف الصعبة و المثيرة .... بلا مقدمات ..
ندخل في الموضوع على طوووول

وصلنا خبر انه الأبلة حكت ...حتوخد الفلاش و توديه للادارة و رح يتصلوا بأهالينا!!!
و الكل خاف و بلش يصرخ .. و لعلمكم في بنات عيطوا!!!! اليوم اللي كنا مبسوطين فيه
تحول لفلم رعب قاتل.....لفوق الـ 18 بس !!!
الموهم يا جماعة الخير.... قررنا نتفاوض مع الأبلة و نحكيلها انه كنا بنحضر فيديو عملناه
ع الموفي ميكر ..عن الصداقة... 
استجمعنا قوانا ... و مشينا للهاوية... يا الله ... قديش الأبلة كانت معصبة!!!
بس حققنا خطوة للأمام انه هي اللي حتشوف الفلاش مش الادارة.. و ازا كان في شي هيك و لا هيك
رح تتصل ع البيت.....

للتنويه فقط... انتوا عارفين انه الفلم لازم يكون فيلو اشي غلط..خصوصا انه اجنبي
بس للأمانة... احنا ما كناش نطلع... كنا بنقدم الفلم..ع المقاطع المحترمة ....

رجعنا بأمل خائب... و سلمنا أسماءنا.... طبعا لازم نستنى ليوم الأحد ليوصل الخبر... إزا كان كويس و لا لأ!! الله يعينا بس...

طبعا البنات ..تابوا ... و راحو يصلوا و يدعو الله.. " و جعلنا من بين أيديهم سدا و من خلفهم سدا فأغشيناهم فهم لا يبصرون " 

يعني في بيناتنا ...بنات شوي باردات... لا عصبوا و لا عيطوا و لا شي...ماخدين الموضوع عادي..لعب في لعب
اللي هما ..ايمووووز و انا هههههه...صرت احكيلهم... " رح تصير زكريات حلوة للثانوية " و عنجد... هيك صارت... يعني هاليوم.. من الأيام اللي مش حنساها أبدا..... كان يوم و لا في الأحلام...
بعد عدة أيام.. الأبلوات نسيوا الموضوع!!! بس كأنه احنا اللي زكرناهم... لأنه بدنا نوخد الفلاش
فحكولنا انه مع الادارة.. مع انه كاان واضح وضوح الشمس... انهم بيضحكوا علينا 
عشان نوقع بمشكلة مع الادارة هههه ..فاهمين مخكووو احنا..... 
فقلنا لحالنا .... بعوض الله.... يوخدوا الفلاش و لا يبهدلونا و يمسحوا فينا الأرض ... أصلا الفلاش مليان فيروسات... اكيد خرب كمبيوتراتهم ههههه

اكتشفت بعدين .... انه تقريبا كل الصف كان بيحضر الفلم معنا ...!!!!
مو بس شلتنا..... الضو كان مطفي فما انتبهت أبدا!!!!!! و مع هيك ... احنا اللي اخدنا البهدلة هههه ...

بس ضلت المصيبة الحلوة.... في ذاكرتنا....و كانت من أروع الأيام اللي عشناها هاي السنة..
و كل ما بنتزكرها.. بنضحك ع حالنا.....

توتة توتة خلصت الحدوتة.....انتظروني مع قصة جديدة..... و بالتأكيد جنونية !!!!
 ملاحظة : كل هاد ملخص اللي صار معنا هههههههههه

طبعا متل ما بتعرفوا....القراءة مش ببلاش... !!! فاهمين ايش المطلوب.....تعلييييييقات...
ملاحظة : الزوار كمان بيقدروا يعلقوا ع الموضوع...

تحياتي إلكم...... سيييمو^_^


  • Digg
  • Del.icio.us
  • StumbleUpon
  • Reddit
  • RSS

مصيبة بس زي العسل -ج3

اليوم المفتوح 1-12-2010 \ الجزء الثالث

مرحبا يا حلوين ... كيفكم اليوم ؟؟ ان شاء الله مبسوطين؟؟؟
طيب... رح نكمل قصتنا .....يلا نبدا

ملينا من الطابور ... فقلنا لحالنا ... خلونا نرجع .. و كملنا الفلم و كان أحلى جو .. اللي قاعدات ع الأرض و اللي بتدحش الشبس في تمها ههه كنا زي كأنا في البيت....مش أي بيت ... سكن جماااعي !!!! ياااااااي 

البنات بلشوا يزييييدوا ع الآخر.. اللي بتدخل و اللي بتطلع .. صارت الدنيا فوضى
فقلت ... خلاص... انا حكون البواب, رح ندخل اللي بدو يحضر و بس , و حكيت للبنات
إزا الأبلة مرت .. ححكيلهم بهدوووء.. و لازم يتحركوا بهدووووء.. بس اسمعوا شو صار

الموهم.. ايموز حكت انها رايحة للحمام.. و احنا كملنا الفلم عادي يعني
و فجأة ..... جابت معها وحدة الله يستر عليها .... ياااااا لهوويييييي!!!!<<< اكيد انتوا عارفين .. اللي عاشوا الموقف معنا
وقتها انا كنت قاعدة ع الطاولة و الطاولة محطوطة قدام الباب..فرجعنا كل إشي زي ما كان
شغلنا الاضواو و طفينا الفلم.... و دخلت ايموز و معها البنت ... انا بحكي بيني و بينها " ليش جبتيها؟؟" و دخليكم ايش ردت " حراام ..كانت لحالها " ههههههه.... عنجد انك تحفة ههه أمورة

المهم..... انقلبنا رأسا على عقب.. جماعة بدت تدرس رياضيات و جماعة لساتها بدحش الشبسات في تمها و الآخرين بيحكوا و فتحوا مواضيع كتيرة .... حركات تانية 

المهم ..طلعت هديك البنت .. بعد ما حست إنه في إن في الموضوع....بس احنا و لا اهتمينا

و رجعنا الفن و الأكشن من جديييييييييد....و كملنا الفلم.. أحلى شي انه كان كوميدي و بناتي ع الآخر و عنجد
كتير حلووو ....فلمي المفضل

وفجأة ........ من هنا تبدأ حكايتنا .... كل اللي قبل كان مقدمة هههههههه

فجأةً .. كانت الأبلة أ قريبة من صفنا..بتحكي مع شوية بنات ... بعدين انا حكيت للناس اللي معنا
( أبلة جاية ) ....ههههههه و عينك ما تشوف إلا النور

الأصوات بدت تطلع .... أبلة .. و أبلة .. يا ويلنا .. و صراااخ و ما بعرف إيش..... صاروا بيتحركوا زي النمل بس يشوفوا أكل ع الأرض... عنجد .... الصوت كان عالي كتيييييييييييييييير!!!!!

و اشي طبيعي ... للأسف... انه الأبلة حتيجي بعد ما سمعتنا ...قربت للصف..و انا ضليتني قاعدة ع الطاولة
حتى يجهزوا البنات و يستعدوا للبهدلة ...و قمت أخيرا بعد صراع دام دقيقتين بيني و بين هديك الأبلة.....

الأبلة بعيون عابسة و مبوزة (( شو كنتوا عمل تعملووووا)) ههههههه... و الصف كان بيرجف زي الجلي
أحلى شي انه شوي منا شردوا.... مش خوف يعني.... من هول الموقف.... بصراحة
كنت منهم... بس انا ما شردت....شدوني معهم ..... هههههههههه و تركنا البقية للأسف ..في ساحة المعركة
حسيت حالي خوّانة.... بس ايش اعمل يعني .........

نزلنا زي الصااااااروخ ع الدرج... و وصلنا لبر الأمان, و احنا بنضحك هههههههه... اجتنا ضربة هبل فجائية 
خلتنا نضحك بدل ما نعيط......

بعدين نزلوا شوية أفراد من الشلة... عشان يطمنوا علينا .. آل يطمنوا.. هههه عشان يحكولنا
المصيبة اللي وقعنا فيها...

اسمعوا ايش صار... الأبلة .. أخدت الفلاش.. و حتوديه للادارة و حتتصل بأهلينا !!!!!!!!!!!!!!!!!!!
صرنا نفكر بحل ... عشان نسترجع الفلاش - طبعا هادي أول خطوة غبية عملناها .. المفروض نطنشها عشان ما تحس بإشي و تنس الموضوع



و بسسسس لهووون ...... و رح أكمل ان شاء الله المرة الجاية
استنوا التكملة و رح تكون الجزئية الأخيرة .... ههههههه و رح تعرفوا
نهاية هالمصيبة الحلوة 

طبعا.... اللي قرأ ما يطلع... إلا بتعليق .... مش كل إشي ببلاش

مع تحياتي إلكم..........سييييمو




  • Digg
  • Del.icio.us
  • StumbleUpon
  • Reddit
  • RSS

مصيبة بس زي العسل -ج2

اليوم المفتوح 1-12-2010 / الجزء الثاني


احم احم..... اكيد انتوا متشوقين عشان تعرفوا ايش صار معنا هههه!!
طيب الموهم...نكمل القصة  ^_^


وصلنا لمسرح الجريمة و لقينا هناك جماعة بنات ماسكات موبايلاتهن و الأغاني شغالة ..يا عيني عليهم 
عايشين الجو ..... بس مو أكتر منا هههه احنا سيينما ... عارفين شو يعني سينما ؟؟!!
!و ايش مع صحباتنا !! يااااي ..كنا شوي و رح نطير من الفرحة <<< هههههه بس يا فرحة ما تمت


الموهم.... اخدنا السماعات ... و شردنا ... 
وصلنا أخيرا للصف بسلام بعد الحرب الباردة .. اللي عشناها من نظرات غريبة و استفزاز نفسي 
ركبنا السماعات و الحمدلله ...بس الشاشة صارت صفرا !!!!!!! هو هو علينا ... زودتها الصراحة !!


مسكت السلك عشان أزبط المنظر ..مرة أصفر و مرة طبيعي ... أصفر ..طبيعي .. بس لو تسمعوا الأصوات
" لا.... كويس .. لا ... كويس ... لا ... " لحد ما زبط و الحمدلله


فتحنا الشبسات و الشوكولاطات و العصاير و بدت البارتي ..هههههه و طبعا شغلنا الفلم هههههه و كنا طافيين الضو 
كان المنظر ..رهييييييييييييييييييب ... من الآخر


بعدين .. صاروا بنات مش من شلتنا ..يدخلوا و يطلعوا .. بدخلو و بطلعو ... يا الله ايمتى حتخلص هالدوشة؟؟!!
فحكينالهم .. اللي بدها تحضر أهلا و سهلا و اللي بدهاش.. الباب بوسع جمل
فسكتوا زي البوبو بعد ما يخلص عياط ... شكلهم بدهم يحضروا معنا ههههههه
بدينا نحضر و نتكيف مع الوضع ... و فجأة !!! رن الجرس =( و الحين لازم ننزل و نحضر طابور اليوم المفتوح


طبعا كلياتنا قلبنا بوزنا ... و نزلنا غصبن عنا .. بعد ما سمعنا أخبار من جهات غير رسمية أنه المديرة حتمر ع الصفوف
طبعا ..نزلنا على دفعات .. عشان ما يشكوا فينا ...الدفعة الأولى نزلت ... و التانية .. زبطت الصف و نزلت متل ما انزلنا


بدت الحفلة الوطنية و كانت زي العرس... البنات معبيات وجوههم مكياج و أصباغ و بوية ...اللي بيقهرني انهم سمر و حاطين بودرة كتيييير .. مبينين زي العرايس - اللعبة مش الحقيقية - و الأغاني الله وكيلكم .... طرشت دنينا
و الجو كااااااااااااان حر ع الآخر...... و فجأة طلعتلي بنت كانت معي بالعاشر..صحبيتي يعني .. كتير أمورة و حبابة
سلمت عليها و كملت المشوار.....


ملينا من الطابور ... فقلنا لحالنا ... خلونا نرجع .. و كملنا الفلم و كان أحلى جو .. اللي قاعدات ع الأرض و اللي بتدحش الشبس في تمها ههه كنا زي كأنا في البيت....مش أي بيت ... سكن جماااعي !!!! ياااااااي 






و بس لهووون ... و حكمل المرة الجاية ..... 
بدنا تعليقات بالهبل هههههه..... بستناكم يا شلة بس احنا .. و يا جماعة الزوار


مع تحياتي إلكم ... سيييمو 







  • Digg
  • Del.icio.us
  • StumbleUpon
  • Reddit
  • RSS

مصيبة .. بس زي العسل



اليوم المفتوح 1-12-2010 - الجزء الأول
مصيبة بس زي العسل


و أخيرا رح ييجي يوم نرتاح فيه من الضغط النفسي اللي كنا عايشين فيه .. امتحان ورا امتحان و مشاريع و تقارير و شغلات بتشيب الراس!! حتى ما في وقت نطلع برا نشم شوية هواء !!!


لحد ما أجى اليوم المنتظر .. اليووووم المفتووح اللي بييجي قبل العيد الوطني لدولة الامارات العزيزة 2-12
طبعا.... شلة بس إحنا ... اللي هما إحنا .. اتفقنا نعمل شوية شغلات... جنونية شوي.. لأ مو شوي .. كتيييير!!


أول شي و أهم شي الحفلة.. طبعا هاي السنة عملنا شي 15 حفلة تقريبا ههههه ... اتفقنا كل وحدة ايش تجيب و انا حكيت رح  اجيب كب كيك  الموووهم..... 


اتفقنا كمان نحضر فلم ... طبعا إحنا العلمي ما عنا يوم و إلا في على الأقلية ذرة نكد فيه... مع إنه كان يوم مفتوح ... كان علينا امتحان !!! و إيش امتحان رياضيات .. تقريبا صفحتين هو.... بس 5 أوراق شفوي !!! << يا لهووي ...!!
و طلعنا من الامتحان ... بعد ما انكسرت ايدينا ... و سطلنا شوي


بس إجانا نشااااااط مش طبيعي ..!!!! ورانا حفلة ... إيش بدكو أكتر من هييك؟؟؟!!!
طبعا اتحد حزبين في الحفلة .. حزبي اللي هما شلة " بس إحنا " و شلة صلوحة.... 


دخلنا قاعة الحفلات ... قصدي حادي عشر علمي 2 .. و رتبنا الصف على أساس إنه سينما << عايشين الجو هههه
و حضرنا الأكل.... طبعا شوية بنات كانوا لساتهم بيخترعوا الذرة في قاعة الامتحان زي إيموز و هيفو و ضوضو كمان هههه


الموووهم.... ركبنا الـ Data Show و الكمبيوتر بس ضل عنا السماعات !!!!! و لكووو الصوت مش مسموووع !!


فقررنا نرتكب جريمة بحق المستوى التعليمي .. اعزرونا يعني هههههه 
أخدت شنطتي البنية الجلدية و فضيتها من كل إشي... طبعا ما كان فيه غير شغلات اسمها رياضيات !!
و انطلقت أنا و الأسستنت تبعوني ههههه قصدي أنا و صحباتي عشان نؤدي المهمة.


مشينا بطريقة عادية و كان ئدامنا الأبلوات.. كانوا بيحكوا مع بعض ... أبصر عن شو .. بس الحمدلله ما شكوا فينا
أصلا معؤول يشكوا فينا .. احنا بنات العلمي ..؟؟


وصلنا لمسرح الجريمة و لقينا هناك.......!!!!!!






بنكمل الجزء التاني ... قريبا...
انتظروووونا ....




يلا بدي أشوف تعليقات بتفتح النفس..... بستناكوووم ^_^

  • Digg
  • Del.icio.us
  • StumbleUpon
  • Reddit
  • RSS